سرقة لوحة فان جوخ ونظرية الامن المصرى - ربنا يستر يا حبيبى

ليس الخبر الغريب هو ان تـُسرق لوحة زهرة الخشخاش ولكن الخبر الغريب هو انها ماتسرقتش لحد دلوقتى. يا اخواننا ومن الاخر نحن ليس لدينا امن فى مصر احنا ربنا سترها معانا عشان خاطر الناس الطيبيين واذا كان حد فاكر ان الامن فى مصر بيعمل اى حاجة غير السيطرة على المظاهرات وماتشات الكورة يبقى واهم.

نحن ليس لدينا اى حس امنى كشعب . عشرات المرات ادخل فندق او مول او بنك وترن البوابة ويقال لى اتفضل يا بيه فنحن بصفتنا شعب عبقرى بالفطرة فرجل الامن الجهبذ الواقف على الباب له نظرته بردةومن وجهة نظره انك شكلك راجل محترم ولن ترتكب جرماوبناء عليه عدى يا بيه.

حتى فى مطار القاهرةالاجراءات الامنية للاسف ضعيفة واذكر انى شاركت فى معرض اربيل (شمال العراق) الاول للكتاب بعد سقوط بغداد وكان فى هذا الوقت العراق لازال فى حالة فوضى عارمة وانا ذاهب وليس لدى فيزا من الحكومة المركزية للعراق فى بغداد با فيزا من "حكومة اقليم كردستان" يعنى عندى 100 سبب يخلى الامن يشوف حكايتى ايه وكنت مهيأ نفسيا تماما للبهدلة ودخلت المطار وكام من سوء البخت انى شايل فى شنطتى صناديق صغيرة تحتوى على كتب توزع هدايا ولكن حين ترى شكلها فى شاشة المراقبة التليفزيونية ستد شكلها مريب للغاية ومن سوء البخت ايضا ان مدير الامن كان يمر والجميع فى حالة "شدة" وطبعا شافوا العلب المريبةوبدءوا يمطرونى بالاسئلة ولكن على طريقة الهدف الذهبى جاء زميل لهم وقال مدير الامن دخل مكتبه خلاص وفجاءة وانا لسة بشرح قالوا: خلاص خلاص لم بس حاجتك يا بيه وتوكل على الله وتوكلت وغادرت الى الجوازات فى 5 دقائق.

اما عن شركات الامن الخاصة فحدث ولا حرج, فى يوم من الايام فى الشركة قررنا ان نؤمن على المقر وذلك بسبب وجود اجهزة غالية نسبيا فى وقتها ولكن شركة التأمين اقترحت وجود شركة امن لأن وقتها كان المكان "مفندق" وجبنا شركة الحراسة وفوجئت بان الباشوات بتوع الامن بيصلوا الجمعة كل جمعة وذلك بمعرفة الاستاذ المدير الادارى الى هو شغلته انه يتأكد انهم شغالين. طبعا اتجننت ولما سألته رد بأستغراب شديد جدا "يعنى ما يصلوش الجمعة يا حبيبى" (طبعا لا تستطيع تمالك نفسك من استخدام الانف فى تلك المواقف) وطبعا حاولت ان اشرح مفهوم الامن له فرد على الرد القاطع "ربنا يستر ياحبيبى" وفعلا اقتنعت برأيه وفسخت التعاقد مع شركة الأمن..

اما عن مدى جاهزية الامن للتصدى للاعمال الارهابية فبجد ربنا يستر انا لا اريد ان اعد اهداف كئيرة جدة حيوية وقد تكون مستهدفة ومشكلتها انها قد تكون فى وسط تجمعات بشرية وبالرغم من ذلك فهى مكشوفة امنييا لاى هاوى فما بالك لو تعامل معها محترفين..

وفعلا ربنا يستر ياحبيبى

مسلسل عايز اتجوز وثقافة البنت الكـُـبة (१)

تعرضت السينما المصرية ومن ثم الدراما التليفزيونية كثيرا لقصص الحب والزواج منذ نشأتهما ولكن بأشكال عديدة فى الاربعينيات والخمسينيات كان تطرح دائما قصة الحب على خلفية طبقية فدائما هناك البطل او البطلة الفقيرة واما ان ينتصر الحب او ييضحى به على حسب المزاج الطبقى للعاملين على الفيلم. فى السيتنيات بدأت تطرح علاقات اكثر مرحا وتفاؤلا من خلال افلام سعاد حسنى وقد رأينا نموذجا لطيف جدا من خلال فيلمى فرقة رضا حيث جميع الشباب فى الفيلم يعملون عملا جماعياولهم هدف واحد هو نجاح فرقتهم وفى سياق ذلك تنشأ علاقات الحب اما فى السبعنييات فكانت المسكلة دائما التى تواجه المحبين هى التحديات الاجتماعية نث الشقة والحصول على عمل والتحقق فى العمل ومقاومة الفساد ولكن طوال الوقت كان هناك بطل وبطلة وحبيب وحبيبة الي ان جاء عصر النفط الذى انتج تلك الثقافة التى ظهرت فى التليفزيون فى هذا المسلسل.

ذهبت الطبقة المتوسطة الى الخليج وعادت بشوية فلوس والوهابية انتشرت بين اسر الطبقة المتوسطة فكرة اننا يجب ان نربى ابناءنا افضل منا فكانت مدراس اللغات بدروسها الخصوصية وحالة التعبئة الملازمة لها وكان تأديب الولاد والبنات فانتشرت فكرة التربية المقفولة والبنت المؤدبة التى لا تكلم اى ولد ولا راجل - ودخلت البنات الجامعة ولكنها لم تكن جامعة خالى بالك من زوزو ولكن جامعة اخرى البنت الشاطرة هيا الى عاملة شلة هيا واصحابها مقفولين على انفسهم تماما وهم غالبا محجبات لا يشاركن فى اى عمل طلابى ولا يذهبن الى اى نادى وليس فى حياتهم اى شء سوى المذاكرة والنميمة ويشكلون نموذجا لثقافةالبنت الكـُــبة

الى هذه الثقافة تنتمى بطلة المسلسل فهى ليس فى حياتها اى شىء سوى عملها الحكومى السخيف الذى ينتهى الساعة 2 ولا نراها تفعل اى شىء فى الدنيا سوى انتظار العريس وسط شلة من البنات اصحابها الذين يحسدون بعضهم بعضا على اى احتمال لعريس ويتنافسون لحضور الافراح يمكن ربنا يكرم وطبعا العريس المنشود له مواصفات معينة فهو خريج جامعة لديه شقة ميسور الحال يعمل فى وظيفة مرموقة او يعمل فى الخليج وياريت يكون شبه كريم عبد العزيز ومقابل ذلك سيحصل العريس على العروسة المؤدبة ذات الشهادة المرموقة ولكنها تعمل فى وظيفة تعسة بلا اى تحديات ولا تجيد التعامل مع الجنس الاخر.

فنحن لا نراها تحدث اى رجل فى المسلسل - لقد ذهبت هذه الفتاة الى مدرسة بنات لغات وعندما ذهبت الى الكلية جلست فى المدرج الشمال المخصص للبنات (الذى حاول الاخوان فرضه فترة من الزمن) والرجل الوحيد الذى كلمها كلمتين حلوين نصب عليها فى ثوانى (فى الكتاب ولا اعرف اذا كانوا حيجيبوها فى التلفزيون ولا لأ) فلاول مرة تبدأ الدراما فى انتاج نموذج البطلة بدون بطل وهو فغلا امر محزن لو كان هذا هو النموذج المسيطر.

اقول لعلا بطاة المسلسل ومن عاش نفس الحياة المقولة الامريكية Get a life او حاولى ان تجدى لنفسك حياة ذات معنى اولا والعريس مش هو الاولوية وهو حييجى كدة كدة لو انت عايشة حياة عاديةبس منتجة وفيها شوية حركة.

وياريت نسمع سحر الموجى قالت ايه فى تد تالكس فى الجامعة الامريكية فى اللينك دة http://youtu.be/6pIDlY2CkQ8

رمضان .... جحيم البرجوازى الصغير

ابى وزوجتى كل سنة من بعد العيد الكبير يبدؤا يعملوا كاونت داون عشان رمضان الجاي فاضل 9 شهور فاضل 7 شهور وكل ما يقرب الكاونت داون ابدأ اتوتر وعندما اظهر توترى بابا يقولى يا ابن الكلب انت كافر ابتسم واتذكر اغنية زياد رحبانى (مقطع بس البلد كافر) ثم ارد عليهم انتم اصلكم عايشين فى ميه اللفت مش حاسيين بحاجة ابويا يقولى اكتر من سبعين رمضان عدا عليا عمرى ما شلنا همه الى لما سياتك قررت تبقى رجل اعمال عالمى بلا وكسة - اقوله ياسيدى اقرا الفاتحة لعبد الناصر الراجل كان معيشكم فى البمبى وسيبلكم نظام حمى الموظفين القدامى لحد اول امبارح طبعا مانتم كنتم رجالته انما احنا ضهرنا للحيط.

شوفتم المفارقة ابى الذى قضى عمره موظفا (طبيبا بيطريا) فى وزارة الزراعة عمره ما شال لرمضان هم وانا الى المفترض انا عندى شركتين وفوق المئةموظف زى الورد بيشتغلوا معاياودارس ام بي ايه فى احد فروع الادارة بس شايل الهم - هم رمضان- ليه؟

يا جماعة من قبل رمضان بكام يوم لحد بعد العيد بكام يوم يتوقف دخلك تماما- بمعنى اخر نحن ولمدة 45 يوم لن نستطيع تحصيل من مليما من اى جهة نتعامل معها واعدها معاكم واحدة واحدة. نحن نتعامل مع 3 انواع من العملاء:

(1) جهات حكومية ووزارات: بدون مبالغة ابقى قابلنى لو عرفت تصرف مليم او تقضى اى مصلحة من نوع. على سبيل المثال الشيك يمر بحوالى 8 مراحل حتى يتم صرفه السنة الى فاتت كان لنا شيك فى وزارة الاتصالات وصل الى المرحلة رقم 7 قبل رمضان بيوم وفى اليوم الأخير عاملها المدير المحترم الذى يوقع اخر توقيع واخدها عارضة. وبالرغم من محاولاتنا المستميتة طوال رمضان تم صرف هذا الشيك بعد اجازة العيد ب 8 ايام- اذن الخيار الاول لن تصرف شيئا

(2) شركة متعددة الجنسيات نعمل معها وموظفين الشركة دى بالرغم من البدل والعربيات الماضية و النضارات السنييه الا انهم زى اى موظفين بيحبوا يانتخوا فى رمضان فبيعملوا ايه؟ فى الشهر الى قبل رمضان يعملوا شغل مضاعف ويموتوا نفسهم - المفترض ان دورنا نكمل وراهم فيجيلنا الشغل فى اول رمضان .. (بيفكرونى بايام المدرسة الابتدائى كانوا المدرسين ييجوا على اجازة نصف السنة ويدونا واجب يطلع دينك طول الاجازة وكان اشهر حاجة اكتب كتاب القراءة من اوله لاخره)

هنا طبعا خير اهو شغل بفلوس بس لاحظ ان اخواننا بتوع الشركة المتعددة دى مش حيشتغلوا اوى فى رمضان فى الشغل الكتير الى انتا واخده الشهر دة الشهر الجاي يارب يجيلك نصه والمطلوب انك تخلص شغل رمضان المضاعف دة خلال الشهر وطبعا مواعيد العمل الغريبة بتاعة رمضان والجو العام بيخلى انتاجية الشاب الفل لا تزيد عن 70% عن المعتاد وما تقدرش تلومه داحنا احسن من غيرنا بكتير اذن لن تستطيع ان تفوترالشغل دة الا بعد العيد بمعنى اخر صرف اى مبلغ يكون بعد العيد.

(3) الى جد عليا السنة دى مشروع المكتبات الى لسة جنين وانا عارف ان حياخد وقت كبير على مايجيب فلوس خصوصا اننا فتحنا فرعين بس وعموما حتى لو اشتغل 100% ماهوش المشروع المربح والكل نصحنى بس انا صممت اعمله لأنى شايف ان الصح اننا نشتغل ضد التيار وفى صالح الناس - المهم طبعا لو انت منتظر اى ايراد من الفروع فى رمضان تبقى راجل واهم. مبن يا معلم حيقرا فى رمضان حيسيبوا الفضائيات والاكل والتروايح ويقعدوا يقروا ... وعلى رأى شعبان عبد الرحيم لما قال لابراهيم عيسى فى حلقة برنامج حمرا النهاردة "محشش يجيلك فى حاجة وحشة"

طبعا فى ضوء ما تقدم لازم البرجوازى الصغير صاحب العمل مننا يا حبة عينى عليه يدخل رمضان وهو عامل حساب دخول رمضان ولديه مرتبات الشهر القادم والتزماته كاملة من ايجارات واشتركات انترنت وفواتير تليفون وخلافه. اعتقد انى نجحت السنة دى بنسبة 80% فى الموضوع دة فاضلى بس يوميين تلاتة احطم امال كام واحد كدة وافهمهم ان اى مدفوعات غير حيوية لن تدفع الا بعد العيد وبعدين انضم لمسيرة الانتخة العظيمة فى الشهر الفضيل وجعله عامر

اول الشهر رجع تانى - بدين اهله

زمان كنت انتظر اول الشهر بكل شوق اما اليوم اول الشهر بالنسبة لى هو الكابوس المتجدد فكما يتحول المستذئبون شهريا مع اول قمر كامل الى ذئاب - اتحول انا لأكون احد ابطال الاساطير الاغريقيةالشهيرةو هو سيزيف الذي يحاول حمل صخرة الى قمة الجبل بلا جدوى

كل اول شهر اضع امامى قائمة ارصدة البنك والشيكات تحت التحصيل وكشف المرتبات واتأمل كيف يتباطء العملاء بصلف غريب عن الدفع ودأئما يكفيك شرف العمل مع هذا العميل الفشيخ.

فهذه "وزارة" يتمنى الجميع العمل معها وهذه شركة اجنبية متعددة الامبلأء

جميل ولكن لماذا لا تدفعون فى الوقت المناسب يا اولاد القحبة
هناك 100 فرد من العاملين فى الشركة فى رقبتى الى متجوز والى عنده اولاد والى طالع عمرة والى عليه اقساط كلهم على اكتافى.

اتذكر مشهد فى مسلسل الزينى بركات عندما كان الامراء المماليك يمتنعون عن دفع الضرائب فما كان من السلطان قنصوة الغورى الا ان خلع عباءة السلطنةوالقى بها قائلا انا حاجيب لكم فلوس منين شوفوا لكم سلطان غيرى!

تمت كتابة تلك السطور بعد وصول المرتبات الى البنك بدقائق يعنى اتحلت مشكلة الشهر دة وعقبال كل شهر واللهم انصرنى على المماليك