ابى وزوجتى كل سنة من بعد العيد الكبير يبدؤا يعملوا كاونت داون عشان رمضان الجاي فاضل 9 شهور فاضل 7 شهور وكل ما يقرب الكاونت داون ابدأ اتوتر وعندما اظهر توترى بابا يقولى يا ابن الكلب انت كافر ابتسم واتذكر اغنية زياد رحبانى (مقطع بس البلد كافر) ثم ارد عليهم انتم اصلكم عايشين فى ميه اللفت مش حاسيين بحاجة ابويا يقولى اكتر من سبعين رمضان عدا عليا عمرى ما شلنا همه الى لما سياتك قررت تبقى رجل اعمال عالمى بلا وكسة - اقوله ياسيدى اقرا الفاتحة لعبد الناصر الراجل كان معيشكم فى البمبى وسيبلكم نظام حمى الموظفين القدامى لحد اول امبارح طبعا مانتم كنتم رجالته انما احنا ضهرنا للحيط.
شوفتم المفارقة ابى الذى قضى عمره موظفا (طبيبا بيطريا) فى وزارة الزراعة عمره ما شال لرمضان هم وانا الى المفترض انا عندى شركتين وفوق المئةموظف زى الورد بيشتغلوا معاياودارس ام بي ايه فى احد فروع الادارة بس شايل الهم - هم رمضان- ليه؟
يا جماعة من قبل رمضان بكام يوم لحد بعد العيد بكام يوم يتوقف دخلك تماما- بمعنى اخر نحن ولمدة 45 يوم لن نستطيع تحصيل من مليما من اى جهة نتعامل معها واعدها معاكم واحدة واحدة. نحن نتعامل مع 3 انواع من العملاء:
(1) جهات حكومية ووزارات: بدون مبالغة ابقى قابلنى لو عرفت تصرف مليم او تقضى اى مصلحة من نوع. على سبيل المثال الشيك يمر بحوالى 8 مراحل حتى يتم صرفه السنة الى فاتت كان لنا شيك فى وزارة الاتصالات وصل الى المرحلة رقم 7 قبل رمضان بيوم وفى اليوم الأخير عاملها المدير المحترم الذى يوقع اخر توقيع واخدها عارضة. وبالرغم من محاولاتنا المستميتة طوال رمضان تم صرف هذا الشيك بعد اجازة العيد ب 8 ايام- اذن الخيار الاول لن تصرف شيئا
(2) شركة متعددة الجنسيات نعمل معها وموظفين الشركة دى بالرغم من البدل والعربيات الماضية و النضارات السنييه الا انهم زى اى موظفين بيحبوا يانتخوا فى رمضان فبيعملوا ايه؟ فى الشهر الى قبل رمضان يعملوا شغل مضاعف ويموتوا نفسهم - المفترض ان دورنا نكمل وراهم فيجيلنا الشغل فى اول رمضان .. (بيفكرونى بايام المدرسة الابتدائى كانوا المدرسين ييجوا على اجازة نصف السنة ويدونا واجب يطلع دينك طول الاجازة وكان اشهر حاجة اكتب كتاب القراءة من اوله لاخره)
هنا طبعا خير اهو شغل بفلوس بس لاحظ ان اخواننا بتوع الشركة المتعددة دى مش حيشتغلوا اوى فى رمضان فى الشغل الكتير الى انتا واخده الشهر دة الشهر الجاي يارب يجيلك نصه والمطلوب انك تخلص شغل رمضان المضاعف دة خلال الشهر وطبعا مواعيد العمل الغريبة بتاعة رمضان والجو العام بيخلى انتاجية الشاب الفل لا تزيد عن 70% عن المعتاد وما تقدرش تلومه داحنا احسن من غيرنا بكتير اذن لن تستطيع ان تفوترالشغل دة الا بعد العيد بمعنى اخر صرف اى مبلغ يكون بعد العيد.
(3) الى جد عليا السنة دى مشروع المكتبات الى لسة جنين وانا عارف ان حياخد وقت كبير على مايجيب فلوس خصوصا اننا فتحنا فرعين بس وعموما حتى لو اشتغل 100% ماهوش المشروع المربح والكل نصحنى بس انا صممت اعمله لأنى شايف ان الصح اننا نشتغل ضد التيار وفى صالح الناس - المهم طبعا لو انت منتظر اى ايراد من الفروع فى رمضان تبقى راجل واهم. مبن يا معلم حيقرا فى رمضان حيسيبوا الفضائيات والاكل والتروايح ويقعدوا يقروا ... وعلى رأى شعبان عبد الرحيم لما قال لابراهيم عيسى فى حلقة برنامج حمرا النهاردة "محشش يجيلك فى حاجة وحشة"
طبعا فى ضوء ما تقدم لازم البرجوازى الصغير صاحب العمل مننا يا حبة عينى عليه يدخل رمضان وهو عامل حساب دخول رمضان ولديه مرتبات الشهر القادم والتزماته كاملة من ايجارات واشتركات انترنت وفواتير تليفون وخلافه. اعتقد انى نجحت السنة دى بنسبة 80% فى الموضوع دة فاضلى بس يوميين تلاتة احطم امال كام واحد كدة وافهمهم ان اى مدفوعات غير حيوية لن تدفع الا بعد العيد وبعدين انضم لمسيرة الانتخة العظيمة فى الشهر الفضيل وجعله عامر
ليست هناك تعليقات:
إرسال تعليق